Er búinn að hanga við plötuspilarann minn í nokkra klukkutíma að hlusta á bestu tónlist í heimi. Ég keypti mér nefnilega Technics SL-1200 M3D á eBay og fékk hann í fangið í morgun. Ótrúlega vel með farinn, kom með nál, flightcase, dustcover og original kassanum og bæklingum og límmiðum og öllu. Er ekki búinn að nota SL í langan tíma, og það var gaman að strjúka honum. (þú hefur oft séð svona)

Hingað til hef ég ekkert getað hlustað á plöturnar mínar, sem er dáldið erfitt þar sem sumar þeirra var gríðarlega erfitt að eignast. Dáldið erfitt sinnum gríðarlega erfitt samasem mjög, mjög erfitt. Það er mjög skemmtilegt að hlusta á allar b-hliðarnar og vókalana sem fólk hefur ekki nennt að rippa, eða vill ekki því það hlustar bara á instrúmentala. Oftast er þetta fólk sem skilur ekki tónlist, he he.

Akkúrat núna er ég að hlusta á 'Rosalie (Pop & Go!)' með Rewind, sem er svo frábært. Þú getur hlustað á Kontrapunkti.

Keypti plötuna að ofan á 6 evrur, og borgaði 8 evrur í sendingarkostnað. Asnalegt, hmm? Þetta er einmitt það bjánalegasta við að finna uppáhalds vínyl á frábæru verði. Oftast reyni ég því að safna í smá bunka til sendingarkostnaðurinn borgi sig, en stundum langar mig bara í þessa einu plötu frá viðkomandi seljara + að það er drulluerfitt að finna sumar plötur í ástandi sem við viljum = verð bara að kaupa hana.

Og já, ég verð. Þú eyðir í leðurjakka og bensín, ég borða grilluð hrísgrjón og kaupi lystisemdir.

Ég er samt búinn að fara algjöra anal-safnaraleið. Keypti danskt plötuhreinsiglundur frá gaur í Bretlandi (kostaði samt jafn mikið/lítið og dót hér í USA), og er búinn að hreinsa allar plöturnar mínar (þrífa sumar, hreinsa aðrar) og stinga þeim í nýjar poly-nærbuxur, og öllum myndaumslögum í plastvasa.

Þetta er svo gaman. Ég veit ekki hversu langt ég er frá því að kaupa mér spæjarablacklight, stækkunargler, hvíta hanska og smásjá, en þetta er hollt fyrir hjartað, svo ég minnist nú ekki á eyrun mín og almenna vellíðan og andlegt jafnvægi.

Annað sem er fáránlega augljóst, er að munurinn á því að hlusta á þessa músík á vínyl úr plötuspilara í gegnum formagnara inn í (góð) heyrnartól, versus vel rippuð mp3 í gegnum tölvuhátalara (meiraðsegja AAC) er ólýsanlegur. Það er allt-allt-alltof langt síðan að ég hef hlustað á "nýja" uppáhalds músík svona, fnæs! Ég ætla ekki að skrifa endalaust um það, því þeir sem vita muninn (og hafa hlustað eftir honum) vita auðvitað hvað ég meina--og ég er ekki að meina það að plötusnúðast með vínyl, heldur að hlusta og heyra músík heima hjá sér--en ég varað fá kalt þorskflak í andlitið. Planið mitt var að rippa plöturnar í AAC eða FLAC og hlusta úr tölvunni, og þó ég geri það alveg þá langar mig í leðurstól og heitt kakó fyrir framan plötuspilarann minn.

Ég fékk spilarann á $306, sem er það sem ég vildi borga, og með öllu því sem ég nefndi að ofan (ónotað flightcase sem kostar annars um $100 og nál á $100) og miðað við að nýr spilari kostar um $500 þá er þetta frábærasti og ástsælasti díll sem ég hef gert í nokkrar vikur. Annar góður díll varað finna frábæra plötu á $7 sem kostar oftast um $60 eða meira (og hún var óopin!), og að finna Izze, sem er allskonar bubblaður ávaxtadjús í glerflöskum, enginn sykur, bara ávaxtaglundur, en er ýkt sætt og svooo gott, mmm, we þamb it all the time.

Sá að Heimilistæki eru að selja SL-1200 á 74.000 krónur. Fliss. Hér er hægt að kaupa tvo nýja SLa og mixer á ca $1200. Reiknaðu muninn. Það fyndna og stórmerkilega er að SL-1200 MKII, sá sem Heimilistæki (virðast) selja, er búinn að vera óbreyttur síðan 1978. Það þýðir, síðan 1978: sama verksmiðja, sama færiband, sömu hlutir, og af þessum sökum (og það sem er svo skemmtilega merkilegt), sama verð. Aftur: plötuspilarinn hefur ALDREI kostað 74.000 krónur. Verðið hefur verið um $500 dollara í þrjátíu ár. Bla bla bla.

Hey, ef þú ert ennþá að lesa, veistu um einhvern sem á íslensku hljómsveitina Módel á vínyl? Ég er helst að leita að 'Lífið er lag', sem var í Eurovision-forkeppninni, en langar í allt sem er til með þessu bandi.

Svo langar mig líka í Eiríks Haukssonar 'Mitt á milli Moskvu og Washington' ef það er til, jafnvel þó að það sé á kassettu.

Nenniru í alvöru að hugsa um þetta í nokkrar mínútur og reyna að muna hvort þú hafir t.d. horft á frænda þinn (þennan sem var með skunkaskott dinglandi úr eyranu) spila þetta á meðan þú renndir þér á hnjánum á parketinu og bræddir Don Cano buxurnar inní hnén þín...plís?

Ég skal hirða/sækja/eiga/kaupa, ef einhver vill henda/gefa/fleygja/selja.

Mig langar líka í Cosa Nostra (með Mána Svavars) en kannski á það enginn?

Og reyndar langar mig líka að komast í plötusafnið þitt ef það inniheldur (íslenskt og útlenskt) diskó og danstónlist frá 1912-1993.

Komaso, átak.

p.s. og ef þú finnur hana, í Gvuðanna bænum ekki koma með eitthvað bull einsog "hún kostar 3.000 kall". Ef þú varst að grafa hana upp afþví að mig langar mikið í'ana þá þýðir það ekki að hún geti kostað mikið. Hvað ætlaru svosem að gera við'ana ef ég vil'ana ekki? Stinga henni aftur í kassann þar sem hún var gleymd? Eða fara niðrá Ingólfstorg þar sem æstur múgurinn bíður eftir að komast í eintak? Einmitt.